喺五星级酒店做嘢，真TMD100感交集。最攰嘅，係对脚；最可怜嘅，係对眼；最唔平衡嘅，就係个心。

 

一对外国嘅白人夫妇，喺条走廊度揽到实一实。然后“唇枪舌战”咗一轮，个老婆入咗T。咁我冇咩事又得闲得滞，咪打量下个老公啰……哇！真係……Hermes手袋，GUCCI皮带，颈上挂住一部现值4XXX蚊嘅N记手机，手戴一只ROLEX，仲揸住部PDA。最攞命嘅就係嗰只大只到令人垂涎三尺嘅LV行李箱！天啊！……有钱人原来就是这样的。等到佢老婆喺T度出咗嚟，卿卿我我完一轮之后，飘然而去。哈哈，只眼真係双重“享受”啊……又眼冤，又眼红。然后又慢慢觉得……好眼瞓。心理宜家好唔平衡，要去揾返个靓仔有钱又冧我嘅心理医生睇下至得~~ 哈哈~~

 

再报道下我嘅惨况：五点钟提早收工去美博城，差啲就做咗迷途羔羊。一出地铁口，东南西北中发白都分唔清。好彩我仲有小小智慧加小小方向感再加小小好命，行咗15分钟，1000辛10000苦，终于到达咗目的地。不过只脚就真係活受罪，咁大个女未试过着一日着住高踭鞋行咗咁多路……返到屋企一睇，前脚掌红晒，并且好似甩咗一样，好似只脚唔係自己嘅咁。做女人真命苦……喺美博城返出嚟，仲饱受埋人间冷暖添：大风吹到我冻不但止，沿途仲有好多野兽。喺我从美博城行到地铁口嘅嗰段漫长漫长的路上，前后一共有八个痴线佬吹口哨，十二个摩佬问我坐唔坐车，不怀好意咁望我嘅人就手指加脚指都数唔晒。唉，三元里，真係，夜晚冇咩事都唔好去啊！

 

后记：LC靓女个姐夫，原来就係“外来色妇本地狼”里面嘅阿三，康祈耀！今日佢家姐姐夫齐齐嚟咗佢铺头探佢。可惜，我与明星缘悭一面，正因为当时阿康祈耀嚟嘅时候，我啱啱喺第个岗位做紧嘢，到我返嚟嘅时候，听讲已经去咗中酒嗰个“贵到无伦”SALON洗头。哈哈~ 我真係冇运喇。如果唔係的话，睇下真人同上镜有咩分别，实际上有几高咁都好吖嘛……呵呵。