好好，真係好好。做唔成恋人，可以做朋友噶嘛！

由初三到宜家（大三都读完喇，真係“大三元”），几多年？唔好数喇，再数都觉得自己老。我唔敢相信哩个世界有奇迹。因为，一路以嚟，无论电视剧，电影，身边嘅人同事，都话俾我知，分咗手嘅情侣係好难做返朋友，就算係，我谂都係得个名嗰只。

但係哩个奇迹偏偏就发生喺我身上，哈哈，真係发梦都会笑醒…… 佢係一个好NICE嘅人，NICE到无从挑剔咁滞…… 嗰阵时，阴差阳错咁拍拖，一年之后又浩浩荡荡咁分手，哈哈，初恋！

宜家咪几好，真係好到我唔信，得闲发下SMS，倾下计，初中同学聚会坐埋一齐，有讲有笑。奇怪，竟然一啲异样嘅感觉都冇，成个相处居然係咁和谐咁舒服，完全冇“再见已是陌路人”嗰种感觉。

仲有一件事，係发梦笑醒之后都会继续坐喺床度笑嘅事：有一日，收到佢嘅短讯。内容係：“我女朋友喺XX路见到你喔，距话你靓咗好多……”（哈哈，係呀，我知道我以前返学一日到黑挂住打波，都冇时间亦冇兴趣去扮靓）。一条多么令人醒神嘅SMS！真係…… 然后，我就回短讯啦，回咗乜……唔记得喇。然后距发过嚟嘅第二条，更为之一震：“係咯係咯，距咁样同我讲，我都觉得我走咗宝喇，哈哈……” 就係哩一条玩笑性质嘅SMS，好似帮我打咗支兴奋剂咁，搞到我开心到瞓唔着咁滞…… 如果距同我讲，“我唔係开玩笑噶”嘅话，我谂我…… 开心到傻咗都似。

哈哈，好夸张？小小啦，至少，我宜家一路打字，心里面都係甜嘅……

 

有你哩个朋友，真係好好。我一定会好好咁珍惜我哋之间嘅呢段友情！嘻嘻……YEAH，饮胜！哈哈……