已经好耐，习惯咗冇绿幽灵嘅日子。

一日都係我唔好，我竟然……嫌弃佢。佢係一条好平凡，好唔起眼嘅绿幽灵手排，甚至，严格嚟讲，只能叫佢做幽灵手排，因为除咗绿色之外，仲有红色同白色嘅矿物质。就喺几个月之前，我一连帮咗几位朋友买到好靓嘅金字塔绿幽灵嘅手链之后，我开始觉得哩条越嚟越唔起眼嘅绿幽灵，好逊色。于是，我将哩条手排，放咗喺个首饰盒度，一放，就係几个月……我并且喺度谂，如果我都有条金字塔绿幽灵嘅话，几好呢……

我知错喇，我错得好紧要。一连几次工作上嘅挫败，一连十三日无聊假期嘅来临，提醒咗我，我唔爱哩条绿幽灵嘅后果，就係条绿幽灵都唔爱我喇。有嘅时候又唔好好珍惜，到冇咗嘅时候先嚟后悔，宜家又一次咁喺我身上应验。

前几日，我打开个盒，见到哩条我曾经心爱又曾经搁置嘅幽灵。回想起哩一排嘅我，我知道，我宜家需要距。我将距摞出嚟，好小心咁放喺个碗度，然后喺冰箱摞支依云水出嚟，将距重新浸一次。朋友都话我，用依云嚟浸，咁dum本啊。其实，我都係想做返啲亡羊补牢嘅嘢，希望距会明白我，我对距嘅歉疚係几咁深，我想用行动嚟证明，我将会好珍惜距。

 

 

后话：宜家嘅我，仲未舍得花咁多钱去买一条金字塔绿幽灵。希望有朝一日，我觉得自己可以买得起一条金字塔，并且将距戴喺手嘅时候，我会特地买个白晶簇，然后将哩条幽灵手排放喺上面，摆去我展柜嘅最上面，时不时再欣赏下距，以表示自己对距嘅一点敬意。